Í morgun var Louise Brodthagen Jensen, fréttamaður Danska ríkisútvarpsins (DR) í beinni útsendingu frá Kyiv í Úkraínu. Á meðan hún ræddi við þáttastjórnendur í morgunþættinum á P1, sem er ein rása DR, heyrðist mikill hvinur yfir höfði hennar.

Þegar hún var spurð hvað þetta væri sagði hún að þetta hafi verið flugvél en skömmu síðar heyrðust sprengingar sem voru greinilega ekki langt frá henni.

Hún sagði strax að hún væri ósködduð og útvarpsfólkið í Danmörku sagði henni að koma sér strax í skjól.

Á heimasíðu DR kemur fram að hún sé ómeidd og sé nú í loftvarnarbyrgi.

Hér er hægt að heyra upptöku af útsendingunni þegar sprengjurnar féllu. Hún er í færslu frá því klukkan 07.54.