Arsenal hefur staðfest að sóknarmaðurinn Gabriel Jesus hafi gengið til liðs við félagið frá Englandsmeisturum Manchester City. Kaupverðið hljóðar upp á 45 milljónir punda og talið er að Jesus hafi skrifað undir fimm ára samning.

Jesus kemur sem áður sagði til Arsenal frá Manchester City þar sem hann hefur eytt síðastliðnum fjórum og hálfu ári. Hann spilaði 236 leiki fyrir félagið og skoraði í þeim leikjum 95 mörk.

Jesus mun spila í treyju númer 9 hjá Arsenal og er fjórðu kaup félagsins í yfirstandandi félagsskiptaglugga.

,,Ég er mjög spenntur,“ sagði Mikel Arteta, knattspyrnustjóri Arsenal eftir að Jesus var kynntur sem leikmaður félagsins. ,,Félagið hefur gert frábæra hluti með því að ná í leikmann af þessu gæðastigi. Ég þekki Gabriel mjög vel persónulega og auk þess hefur hann orðspor úr ensku úrvalsdeildinni þar sem hann hefur náð miklum árangri. 

,,Þetta er staða sem við höfum haft á radarnum hjá okkur í langan tíma og við höfum nælt í leikmanninn sem við vildum fá í þessa stöðu. Ég er mjög ánægður.“ 

🇧🇷 Nosso Novo Número Nove

— Arsenal (@Arsenal) July 4, 2022