Manchester United hefur staðfest á heimasíðu sinni að félagið hafi náð samkomulagi við Real Madrid og Raphael Varane um komu leikmannsins til Manchester.
Það kom fram í gær að félögin hefðu náð saman. Talað er um kaupverð í kringum 40 milljónir punda.
,,Það er Manchester United sönn ánægja að tilkynna að félagið hefur náð samkomulagi við Real Madrid varðandi félagaskipti franska varnarmannsins og heimsmeistarans Raphael Varane. Skiptin ganga í gegn svo lengi sem leikmaðurinn stenst læknisskoðun og að skilmálar verði samþykktir við hann,“ segir á heimasíðu Man Utd.
Hugsanlegt er að Varane verði ekki kynntur formlega til leiks fyrr en í næstu viku þar sem hann þarf að klára sóttkví á Englandi.
Hinn 28 ára gamli Varane hefur verið í herbúðum Real Madrid í áratug.
Hann á þá 79 landsleiki að baki fyrir Frakkland. Hann var til að mynda hluti af liði þeirra sem varð heimsmeistari árið 2018.