Davíð Oddsson, ritstjóri Morgunblaðsins, átti í lok árs 2020 0,19 prósent hlut í tryggingafélaginu TM eða alls 1.439 milljón hluti að nafnvirði. Í nóvemberlok á síðasta ári var ákveðið að sameina Kviku banka, TM og fjármögnunarfyrirtækið Lykil með fyrirvara um samþykki eftirlitsstofnana. Það samþykki fékkst síðan í lok mars í ár og þar með rann sameiningin í gegn. Hluthafar TM fengu 55% hlut í sameinuðu félagi.
Að því gefnu að Davíð hafi enn verið hluthafi í TM þegar sameiningin gekk í gegn þá hefur hann fengið alls 4.679.142 hluti í Kviku banka. Miðað við núverandi gengi er sá hlutur rúmlega 112 milljóna króna virði.
Segja má að Davíð hafi verið afar útsjónarsamur að fjárfesta í hlutabréfum TM því sú ráðstöfun hefur skilað sér ríkulega til baka enda hefur sameinað félag hækkað mjög í virði. Í árslok 2019 átti hann 224 þúsund hluti að nafnvirði í TM en virðist hafa bætt við sig rúmlega 1,2 milljónum hluta á árinu 2020.
Davíð hefur ekki brugðist við fyrirspurn DV um hvernig hann tryggi að hagsmunir hans í Kviku hafi ekki áhrif á umfjöllun Morgunblaðsins um málefni félagsins.
Hávær umræða um hlutabréfaeign fjölmiðlamanna spratt upp á dögunum þegar Kjarninn greindi frá því að Hörður Ægisson, ritstjóri Markaðarins, ætti hluti í 13 skráðum hlutafélögum á markaði fyrir samtals 9 milljónir króna, mest í Arion banka eða 5 milljónir. Í fréttinni kom fram gagnrýni á að Hörður hefði þrátt fyrir eign sína fjallað um málefni fyrirtækjanna og því velt upp hvort að um brot á siðareglum Blaðamannafélagsins væri að ræða.
Í fimmtu grein siðareglna Blaðamannafélagsins stendur: Blaðamaður varast að lenda í hagsmunaágreiningi, til dæmis með því að flytja fréttir eða frásagnir af fyrirtækjum eða hagsmunasamtökum þar sem hann á sjálfur aðild. Í áðurnefndri frétt Kjarnans vakti það talsverða athygli að Sigríður Dögg Auðunsdóttir, formaður Blaðamannafélagsins, sagði að þessi regla gilti um hlutabréfaeign blaðamanna og að engu máli skipti hversu stóran hlut þeir eiga.
Hörður brást við fréttaflutningi Kjarnans með yfirlýsingu og vísaði vangaveltum um meint brot á siðareglum alfarið á bug enda væri ekkert minnst á hlutabréfaeign blaðamanna í siðareglunum. Þá lýsti hann furðu sinni á þeirri túlkun Sigríðar Daggar um að ekki væri gerður greinarmunur á því hvort að blaðamaður eða maki hans ætti örlítinn hlut í félagi eða verulegan hlut og jafnvel aðkomu að stjórn fyrirtækis.
Um sínar eigin fjárfestingar sagði Hörður að þær væru til langs tíma og að hann stundaði engin regluleg viðskipti með hlutabréf. Hlutabréfaeign hans væri því óveruleg og allir samstarfsmenn hans upplýstir um þessa hagsmuni hans.
