Sif Huld Albertsdóttir, bæjarfulltrúi Ísafjarðarbæjar, hefur gert bótakröfu  á hendur Ísafjarðarbæ vegna meints eineltis í sinn garð. Hún hefur jafnframt beðist lausnar frá störfum sínum sem bæjarfulltrúi sem og öðrum verkefnum sem því fylgja, en hún hefur setið í bæjarstjórn fyrir hönd Sjálfstæðisflokksins síðastliðin þrjú ár.

Þetta kemur fram í fréttatilkynningu sem Sif Huld hefur sent á fjölmiðla.

Ísafjarðarbær fékk ráðgjafafyrirtækið Attentus til að rannsaka ásakanir Sifjar Huldar um einelti í sinn garð af hálfu embættismanns bæjarins. Sif Huld segir að niðurstaða greiningar Attentus hafi verið sú að um einelti væri að ræða. Enn fremur sé Ísafjarðarbær gagnrýndur fyrir að hafa ekki aðhafst fyrr í málinu.

Umrædd skýrsla hefur ekki verið birt og beiðni DV um að fá hana í hendur hefur verið hafnað, af hálfu Sifjar Huldar, á þeim forsendum að efni skýrslunnar sé trúnaðarmál.

„Vegna þessa seinagangs og aðgerðaleysis hef ég ákveðið að gera bótakröfu á hendur Ísafjarðarbæjar, þar sem niðurstaðan var ótvírætt, langvarandi einelti. Ég hef falið Sævari Þór Jónssyni lögmanni að gæta réttar míns í málinu,“ segir Sif Huld í tilkynningu sinni. Hún segir enn fremur:

„Ég vil þakka bæjarfulltrúum kærlega fyrir samstarfið á síðustu þrjú árin og ég vil sérstaklega þakka íbúum Ísafjarðarbæjar innilega fyrir það traust að fá að starfa í þeirra þágu, en á meðan ég get ekki treyst kerfinu get ég ekki unnið fyrir kerfið í þágu íbúanna.“