Danska ríkisstjórnin ákvað í gær að gefa Slésvík-Holtsetalandi í Þýskalandi 59.300 skammta af bóluefni AstraZeneca gegn kórónuveirunni. Danir nota bóluefnið frá AstraZeneca ekki vegna hættunnar á lífshættulegum aukaverkunum og eiga því nokkur hundruð þúsund skammta af því í geymslu.

Jeppe Kofod, utanríkisráðherra, sagði í gær að það sé mjög jákvætt að Danir geti hjálpað nágrönnunum í Slésvík-Holtsetalandi á þennan hátt en Slésvík-Holtestaland liggur að dönsku landamærunum á Jótlandi og er samvinna og samgangur á milli landanna mikill.

„Þau bóluefni sem við eigum á lager í Danmörku á að sjálfsögðu að nota áður en þau verða of gömul. Slésvík-Holtsetaland er á þeim stað í faraldrinum að talið er að bóluefnið frá AstraZeneca muni gagnast vel,“ segir í fréttatilkynningu fra utanríkisráðuneytinu.