Morgunblaðið skýrir frá þessu í dag. Fram kemur að Ólafur Laufdal Jónsson, annar eigandi Hótels Grímsborga, reikni með að svíturnar verði komnar í notkun fyrir árslok en þær eru liður í að gera enn betur við gesti hótelsins. Hótelið er fimm stjörnu hótel og er fyrsta íslenska hótelið sem hefur náð þeim áfanga.
Haft er eftir honum að pantanir séu farnar að berast erlendis frá en sterkustu markaðirnir eru þeir bresku og bandarísku. Hann sagði að þrátt fyrir að ekki sé um mikinn fjölda að ræða sé fjöldi bókana stöðugur og sé aukinn áhugi frá Bandaríkjunum greinanlegur.
Morgunblaðið hefur eftir Jóhannesi Þór Skúlasyni, framkvæmdastjóra Samtaka ferðaþjónustunnar, að bandaríski markaðurinn sé að taka við sér og sé fyrri til þess en sá evrópski. Þau fyrirtæki sem þjónusti aðallega evrópska ferðamenn geti þurft að bíða lengur en þau sem þjóna bandaríska ferðamenn.
Ástæðan er hvernig bólusetningar hafa gengið fyrir sig og staðan á hinum mismunandi markaðssvæðum.
Icelandair flýgur til 34 áfangastaða í Evrópu og Norður-Ameríku í sumar og Delta Air Lines mun hefja flug hingað til lands frá þremur bandarískum borgum í maí.
