Kristján Þór Júlíusson, sjávarútvegs- og landbúnaðarráðherra, ætlar ekki að gefa kost á sér til endurkjörs í alþingiskosningunum í haust. Morgunblaðið greindi frá ákvörðun Kristjáns en í viðtali við blaðið sagðist hann hafa tekið ákvörðunina eftir miklar pælingar.
„Ég hef hugsað þetta og búinn að gera það upp við mig, að þetta sé orðið gott eftir 35 ára þjónustu í stjórnmálum og ætla því ekki að leita endurkjörs í haust,“ segir Kristján en hann ætlar ekki að hætta alfarið í stjórnmálum. Í frétt Morgunblaðsins segir að hann verði áfram virkur innan Sjálfstæðisflokksins þrátt fyrir að vera ekki í forystunni á þingi.
Þegar Samherjamálið kom upp í lok ársins 2019 voru haldin mótmæli á Austurvelli þar sem krafist var afsagnar Kristjáns sem sjávarútvegráðherra vegna tengingar hans við Þorstein Má Baldvinsson, forstjóra Samherja. Mótmælin báru lítinn árangur á sínum tíma en nú er ósk mótmælenda búin að rætast þar sem ljóst er að Kristján verður ekki sjávarútvegsráðherra á næsta ári.
