„Þetta er allt í móðu,“ segir Raul Jimenez framherji Wolves sem er að náta bata eftir að hafa höfuðkúpubrotnað í desember á síðasta ári.

Jimenez og David Luiz, leikmaður Arsenal, skullu saman með fyrrgreindum afleiðingum. Jimenez var fluttur meðvitundarlaus á sjúkrahús í kjölfarið. Hann gekkst undir vel heppnaða aðgerð.

„Þetta er mjög erfitt og ég man ekkert í raun hvað gerðist, hlutirnir eru allir í móðu hjá mér,“ segir Jimenez þegar hann ræðir atvikið.

„Það eina sem ég man er að hafa vaknað upp á spítala eftir að aðgerð var lokið, það var mjög flókið að fara heim og geta ekki gert neitt.“

Framherjinn frá Mexíkó segir frá því að hann hafi þurft að liggja fyrir um nokkurt skeið og að unnusta hans hafi þurft að færa honum mat í rúmið.

„Allar hreyfingar mínar urðu að vera mjög hægar, unnusta mín hefur hjálpað mér ótrúlega í þessu ferli.“

Jimenez er byrjaður að mæta á æfingasvæði Wolves en ekki er vitað hvenær hann verður leikfær á nýjan leik.