Dómstóll í Sacramento fann hann sekan um 46 ákæruatriði í síðasta mánuði en hann var ákærður fyrir ofbeldi gegn níu konum á árunum 1991 til 2006. Þær báru allar vitni fyrir dómi.
Samkvæmt frétt CNN þá bjuggu konurnar í norðurhluta Kaliforníu og urðu fyrir barðinu á Waller þar. Í mörgum tilfellum braust hann inn á heimili þeirra, batt þær og nauðgaði. Hann lét yfirleitt til skara skríða að næturlagi og stundum rændi hann konunum og fór með þær að hraðbönkum þar sem hann lét þær taka út peninga og stundum stal hann munum af heimilum þeirra.
Frá 2006 hafði lögreglan búið yfir lífsýnum sem tengdu sex mál saman. Ekki var vitað hver Waller var því lífsýni úr honum höfðu aldrei verið skráð í opinbera gagnagrunna. Fyrir tveimur árum komst lögreglan loksins áleiðis með að bera kennsl á hann þegar lífsýni úr honum, sem fannst á einum afbrotavettvanginum, var notað til að þróa sérstakan DNA-prófíl. Með því var hægt að þrengja hringinn að hugsanlegum ættingjum ofbeldismannsins og þannig þrengdist hringurinn sífellt að Waller. Þetta er sama tækni og var notuð til að hafa uppi á the Golden State Killer. Waller var síðan handtekinn á vinnustað sínum í Berkeley að sögn saksóknara. „Það skipti engu máli hvað ég gerði. Þetta var DNA-mál. Við gátum ekki horft fram hjá þeirri staðreynd að lífsýni úr honum voru á nærri öllum afbrotavettvöngunum,“ sagði Joe Farina verjandi Waller.
