Í forsetakosningunum 2016 sigraði Donald Trump í Pennsylvania en mjótt var á munum milli hans og Hillary Clinton eða 0,7 prósentustig. Nú reynir Trump að fá „úthverfakonur“ í ríkinu til að styðja sig í kosningunum að þessu sinni. Trump á á brattann að sækja í ríkinu og „úthverfakonurnar“ eru mikilvægur kjósendahópur sem gæti ráðið úrslitum.

„Úthverfakonur, viljið þið vera svo góðar að láta ykkur líka við mig? Ég bjargaði fjandans hverfunum ykkar,“

sagði Trump þegar hann biðlaði til þeirra.

The Guardian skýrir frá þessu. Ný skoðanakönnun ABC News og The Washington Post sýnir að hvítar konur sem teljast vera með hófsamar pólitískar skoðanir hafi snúið baki við Trump í Pennsylvania. Þetta getur komið sér illa fyrir Trump sem mælist með minna fylgi en Joe Biden í ríkinu og á landsvísu. Tuttugu kjörmenn eru í boði í Pennsylvania en á landsvísu eru þeir 538 og því þarf 270 til að tryggja sér forsetaembættið.