Eigendur veitingastaðar í Changsha í Kína hafa beðist afsökunar eftir að hafa beðið gesti um að vigta sig þegar þeir mættu á staðinn. Tveimur vogum var komið fyrir við innganginn og áttu gestir að stíga á þær og skrá niðurstöðuna í app. Þessar upplýsingar notaði veitingastaðurinn síðan til að stinga upp á hvað væri sniðugt fyrir viðkomandi að fá sér að borða. Einnig var búið að koma upp skilti sem á stóð: „Aðgerð tómir diskar“.

Þetta var gert til að taka þátt í átaki yfirvalda gegn matarsóun. En óhætt er að segja að þetta tiltæki hafi ekki fallið í góðan jarðveg. Myllumerki um veitingastaðinn hefur verið á miklu flugi á samfélagsmiðlum að undanförnu í Kína og á samfélagsmiðlinum Weibo hefur gagnrýni á veitingastaðinn verið opnuð 300 milljón sinnum.

Í afsökunarbeiðni veitingastaðarins segir að markmiðið hafi verið stöðva matarsóun og fá viðskiptavinina til að panta mat á heilbrigðan hátt. Þeir hafi aldrei verið neyddir til að vigta sig.