Áslaug Arna Sigurbjörnsdóttir, dómsmálaráðherra, hefur óskað eftir því við fangelsismálastjóra að framkvæmd lokunar á fangelsinu á Akureyri verði frestað til 15. september. Þetta kemur fram í færslu Áslaugar á Facebook.

Áslaug kveðst hafa óskað eftir því við ríkislögreglustjóra að lagt verði mat á hugsanlegan viðbótarkostnað lögreglunnar á Akureyri vegna fyrirhugaðrar lokunar fangelsisins, en slíkt mat mun ekki liggja fyrir við lok mánaðar þegar lokunin átti upphaflega að eiga sér stað.

„Þessi úttekt mun ekki liggja fyrir þegar lokunin á að koma til framkvæmda í lok mánaðarins. Í ljósi þess og í framhaldi funda með hagaðilum fyrir norðan sl. þriðjudag hef ég óskað eftir því við fangelsismálastjóra að framkvæmd lokunarinnar á fangelsinu á Akureyri verði frestað til 15. september. Enginn afplánar nú í fangelsinu vegna sumarleyfa.“

Áslaug segir að markmið hennar sé þó óbreytt, það er að tryggja velferð fanga og eins góða þjónustu og hægt sé að veita, með þó tilliti til hagkvæmni í rekstri fangelsiskerfisins til lengri tíma og styttingu boðunarlistans.

„Á sama tíma verður einnig að búa þannig um hnútana að almenn löggæsla á Norðurlandi eystra verði ekki fyrir skerðingu vegna lokunarinnar.“