Unnur Sverrisdóttir, forstjóri Vinnumálastofnunar, er ósammála því að fjármunir hafi verið sviknir út úr ríkissjóði þegar hlutabótaleiðin var misnotuð, líkt og lýst er í skýrslu Ríkisendurskoðunar.

Þetta segir hún við Eyjuna í helgarblaði DV:

„Það var enginn að svíkja neitt út í raun og veru. Það er nú þannig. Ég er ekki sammála því, mér finnst fólk voða fljótt að gleyma, í mars stóðum við frammi fyrir gríðarlegum hópuppsögnum, það vissi í rauninni enginn sitt rjúkandi ráð. Það var nýkomið samkomubann og fyrirtækin vissu ekki hvaðan á þau stóð veðrið, og fyrirtæki voru að loka hvert á fætur öðru, þar sem túristarnir voru farnir heim. Ráðamenn báðu fólk um að halda ráðningarsambandi við starfsfólkið á meðan það væri verið að átta sig á hlutunum, þannig var ástandið þá. Því er það mín skoðun að þetta hafi heppnast vel að flestu leyti.“

Skýrsla Ríkisendurskoðunar er býsna skýr hvað þetta varðar og er tekið fram í henni að borist hafi ábendingar um að leiðin hafi verið misnotuð af fyrirtækjum sem „áttu ekki í bráðum vanda“, né höfðu orðið fyrir samdrætti af völdum kórónuveirunnar.

Einnig var tekið fram að launafólk hefði verið látið skila meira vinnuframlagi en lækkað starfshlutfall sagði til um. Sem og að launagreiðendur hefðu breytt eigin launum eftir á, svo þeir gætu sýnt fram á hærri laun en þeir höfðu, til að fá hærri greiðslur frá ríkinu.

Sum fyrirtæki hafa þegar endurgreitt þá fjármuni sem þeir þáðu frá ríkinu vegna hlutabótaleiðarinnar, eftir að fréttir bárust um að stöndug fyrirtæki sem hefðu skilað miklum hagnaði og greitt mikinn arð til eigenda sinna, hefðu farið hlutabótaleiðina.

Ekki liggur þó fyrir hvert tap ríkissjóðs var vegna misnotkunarinnar samkvæmt Unni, fara ætti yfir þau mál þegar tími gæfist.

Nánar er fjallað um málið í helgarblaði DV.