„Einn faðir fékk tár í augun þegar félagsráðgjafi sagði honum frá því að börnin hans fengju hjól frá Barnaheillum, sem endurspeglar markmið hjólasöfnunarinnar, að gleðja börn og fjölskyldur þeirra,“ segir í tilkynningu frá samtökunum Barnaheill. Þrjú hundruð börn víðsvegar um landið fengu hjól í gegnum söfnun samtakanna, voru þar í hópnum margir einstaklingar sem hafa aldrei átt reiðhjól áður á ævinni.

Hjólaúthlutuninni er lokið en framundan er hjólasala sem hefst á morgun, fimmtudag, og stendur í þrjá daga. Þar gefst landsmönnum kærkomið tækifæri til að eignast reiðhjól á góðu verði og styðja um leið við mikilvægt starf samtakanna.

„Þessi sala sem er að fara að byrja núna er til þess að geta haldið áfram að fjármagna verkefnið sem slíkt, sem byggir á því að úthluta hjólum til barna og ungmenna,“ segir Linda Hrönn Þórisdóttir, verkefnastjóri hjá Barnaheillum, í samtal við DV.

„Þetta eru allt notuð hjól sem við fáum en mikið af hjólum í mjög góðu ástandi og því virðist mikil endurnýjun hafa átt sér stað. Við höfum fengið mikinn fjölda mjög góðra hjóla til okkar og erum gríðarlega þakklát fyrir það,“ segir Linda enn fremur.

Hjólasalan fer fram að Smiðshöfða 7 í Reykjavík. Á fimmtudag er opið frá kl. 14-20, föstudag 14 til 18 og laugardag 12 til 16. Nánari upplýsingar eru á Facebook-síðu hjólasölunnar.