Erum við að gera nóg til að stemma stigu við andlátum samlanda okkar úr ofneyslu fíkniefna? Þetta er spurning sem þingmaður Samfylkingarinnar, Ágúst Ólafur Ágústsson, varpar fram með athyglisverðum hætti á Facebook.

„Segjum að hér hrapaði flugvél í innanlandsflugi annað hvert ár. Að hér dæju margir tugir einstaklinga í flugslysi á milli Reykjavíkur og Akureyrar á hverju ári. Segjum að hér geisaði farsótt og á tíu daga fresti myndi einstaklingur deyja úr henni. Segjum að banaslys í umferðinni myndu fimmfaldast frá því sem nú er. Ég er sannfærður um að samfélagið allt stæði á öðrum endanum. En sem betur eru þessi tilteknu atvik ekki að gerast.“

Hins vegar er það staðreynd á hér á landi, þó samfélag okkar sé fámennt, ríkir faraldur sem margir hafa tapað lífinu fyrir.

„Því á um 10 daga fresti deyr einstaklingur vegna ofneyslu fíkniefna. Á 10 daga fresti er hér íslensk fjölskylda í molum vegna þessara dauðsfalla. Þrátt fyrir þetta er furðulítil umræða um þessi mál. Þetta er faraldur sem ekki fer hátt um.“

Bendir Ágúst á það að á fimmtudag verður haldin fundur á vegum SÁÁ um ópíóðafaraldurinn á Íslandi og dauðsföll fíknisjúklinga. Það sé sorglegt að nauðsyn sé á slíkum fund.