Fyrir nokkrum vikum kynnti Tesla „Cybertruck“ til sögunnar. Um algjöra nýjung er að ræða í bílahönnun en lítið útlit er fyrir að bílar þessarar gerðar sjáist á evrópskum vegum á næstunni. En nú hafa rússneskir hönnuðir hannað og teiknað hús sem passar vel við bílinn.

Það er arkitektahópurinn Modern House sem hefur birt teikningar af „CyberHouse“ sem er teiknað út frá stíl bílsins. CNN skýrir frá þessu. Segja má að „CyberHouse“ sé nokkurskonar dómsdagshús því það á að geta staðið af sér fellibylji, jarðskjálfta og geislavirkni.

Auk þess segja arkitektarnir að húsið geti staðið af sér árás uppvakninga. Húsið getur rúmað sjö manns ef til „dómsdags“ kemur. Alex Wizhevsky, leiðandi arkitekt Modern House, fer ekki leynt með að hönnun hússins sé undir áhrifum af fyrrnefndum bíl Tesla og hönnun kjarnorkukafbáta. Í samtali við CNN sagði hann að arkitektarnir hafi tekið grunnatriðin úr hönnun kjarnorkukafbáta og notað við hönnun hússins.

Hér fyrir neðan er hægt að sjá stutt myndband um húsið og hvernig það virkar.