Styrmir Gunnarsson, fyrrverandi ritstjóri Morgunblaðsins, segir miklar breytingar í vændum með sívaxandi netviðskiptum en vefverslun hefur aukist stórkostlega á liðnum árum.

„Fréttir um aukin netviðskipti hér á Íslandi geta haft í för með sér enn meiri breytingar á verzlun og viðskiptum en kannski blasir við. Þær þýða ekki bara, að viðskiptin færist frá íslenzkum verzlunum til netdeilda þeirra, þótt það út af fyrir sig geti dregið úr þeirri „gamaldags“ verzlun að fara út í búð,”

segir Styrmir og nefnir að verðsamkeppni hafi alltaf verið lítið á Íslandi og stundum lítil sem engin:

„Það leiðir bæði af fámenni og þar af leiðandi litlum markaði og af hinu að við búum á eyju norður í höfum og það kostar mikið að fara til annarra landa. Netviðskiptin þýða, að nú getur fólk hér stundað smásöluviðskipti nánast hvar sem er í heiminum. Og í þeim efnum kemur samkeppnin ekki sízt frá Asíu. Það er jafn auðvelt að eiga viðskipti við netverzlanir í Asíu eins og hér heima, þótt afgreiðslutíminn sé kannski nokkrum dögum lengri.”

Harðnar á dalnum

Styrmir segir þessa þróun geta orðið varhugaverða:

„Þegar fólk byrjar að átta sig á verðmuninum hér heima og þar, hvort sem um er að ræða gleraugu, skó eða fatnað eða nánast hvað sem er, getur farið að harðna á dalnum í verzlun hér. Með einum eða öðrum hætti mun þetta svo leiða af sér að eftirspurn eftir verzlunarrými mun dragast saman.”