„Ég var mögulega óvinsælasta manneskjan á Laugarvatni áðan þegar ég tók að mér endurgjaldslaust að fræða ferðamenn um baðvenjur áður en haldið er til laugar,“ segir Viktoría Hermannsdóttir, fréttakona á RÚV, á Facebook og bætir við að átakið hafi ekki vakið mikla lukku. Hún hafi gert þetta tilneydd „enda er það ógeðslegast í heimi þegar fólk fer óbaðað ofan í.“ Vill Viktoría að ferðaþjónustan fari í átakið „Böðum túristana.“ Annar fjölmiðlamaður, Jóhann Hlíðar Harðarson, segir að Íslendingar kunni aðeins eina reglu og hún sé að baða sig áður en farið er í sund.

„Aðrar reglur kunna þeir alls ekki; þeir kunna ekki að nota stefnuljós, þeir kunna ekki að aka á tveggja akreina götum, þeir kunna ekki að fara í rúllustiga, þeir eru alveg að læra að standa í biðröð, en af því að þeir kunna að baða sig í sundlaugum, þá finnst þeim svo roooosalega skrýtið að aðrar þjóðir heims kunni ekki þá reglu. Öðrum þjóðum finnst skrýtið að Íslendingar líti á þessa reglu sem mikilvægustu reglu alheimsins og virði ekki aðrar reglur.“