„Gastu ekki fengið þér stærra sjónvarp? Þetta er ekki það fallegasta sem maður hefur séð,“ sagði sjónvarpsmaðurinn góðkunni, Sindri Sindrason, þegar hann heimsótti Þóru Sif Friðriksdóttur í þætti sínum, Heimsókn, sem sýndur verður á miðvikudag.
Stutt innslag úr þættinum hefur verið birt á vef Vísis en þar má sjá Sindra spyrja Þóru ýmissa óviðeigandi spurninga – og er ljóst að henni var ekki hlátur í huga í viðtalinu.
Það sem hún vissi þó ekki var að vinkonur hennar höfðu skipulagt uppátækið enda stóð til að gæsa hana þennan dag. Sindri setti út á fleira en stórt sjónvarp í innslaginu, til dæmis borðstofuborðið. „Af því að þú átt náttúrulega svo fallegt heimili, en svo kemur borðstofuborðið,“ sagði Sindri yfirlætisfullur þegar hann benti á fallegt borðið.
Stuttu síðar birtist vinkonuhópurinn fyrir utan heimili Þóru og brosti Sindri vandræðalega til hennar. „Djöfull ertu orðinn leiðinlegur,“ sagði Þóra meðan vinkonuhópurinn skellti upp úr.
Þáttur Sindra er sem fyrr segir sýndur á miðvikudagskvöld.
Þetta þrælskemmtilega innslag má sjá hér að neðan:
