„Þú ert manneskja sem kannt að koma milljónum manna til að hlæja. Ég ákvað með þessu verkefni að sýna þér að allri heimsbyggðinni er annt um þig.“ Þetta segir úkraínska listakonan Milena Barshatskaya, í myndbandi sem hún hefur búið til og birt á Youtube.

Myndbandið samanstendur af ótal kveðjum til leikarans Stefáns Karls Stefánssonar, sem glímt hefur verið erfið veikindi undanfarið. Stefán Karl er þekktur út um allan heim fyrir túlkun sína á Glanna glæp og öðrum skáldsagnapersónum í Latabæ.

„Þú breyttir lífi mínu til hins betra,“ segir í einni kveðjunni frá Rússlandi en í myndbandinu berast Stefáni kveðjur frá flestum heimshornum, svo sem Þýskalandi, Indónesíu, Bandaríkjunum, Argentínu, Ítalíu, Rússlandi, Kasakstan, Tyrklandi, Póllandi og Frakklandi. „Þú ert einn fárra sem veitti mér styrk til að komast í gegn um erfiða tíma,“ segir einn aðdáandi Stefáns Karls. „Þú ert stórkostleg manneskja,“ segir annar. „Takk fyrir að gera æsku mína betri. Þú varst mér eins og vinur.“

Milena lýkur myndbandinu á að tala um hversu frábær leikari og söngvari Stefán Karl er. „Takk fyrir allt. Úkraína elskar þig. Heimsbyggðin elskar þig.“

[youtube https://www.youtube.com/watch?v=U-pWeDridxw&w=560&h=315]

Stefán Karl þakkar fyrir sig í hópnum We Are Number One – Live Event, á Facebook. Þar segir hann að tímasetningin hafi verið frábær því hann byrji í geislameðferð á morgun. Hann hafi tárast við að horfa á myndbandið. Hann sé stuðningnum afar þakklátur en honum hafa borist árnaðarkveðjur í ýmsu formi. „Örlæti ykkar og stuðningur hefur gert mér miklu auðveldara fyrir að berjast við sjúkdóminn. Ég er fullur auðmýkt og gleði yfir því að vera hluti af þessu samfélagi.“