Guðmundur Ingi Guðbrandsson, umhverfis- og auðlindaráðherra, er afar ósáttur við ákvörðun Kristjáns Þórs Júlíussonar, sjávarútvegsráðherra, um að leyfa áframhaldandi veiðar á langreyði og hrefnu til fimm ára. Í samtali við RÚV segir hann ekki litið til efnahagslegra og samfélagslegra þátta í ákvörðun Kristjáns:

„Hún veldur mér miklum vonbrigðum þessi ákvörðun. Ég er ósammála því að ráðast í þessar hvalveiðar eins og komið hefur fram í máli mínu áður. Þarna lítur ráðherrann til ráðgjafar Hafrannsóknastofnunar sem er gott og vel en mér finnst vanta að líta til fleiri þátta þegar kemur að sjálfbærri nýtingu, eins og efnahagslegra og samfélagslegra þátta. Svo það sé alveg á hreinu er þetta ákvörðun sjávarútvegsráðherra og í hans boði. Ég er bara ósammála þessu en valdheimildirnar eru hjá sjávarútvegsráðherra. Þannig að þetta eru bara ákvarðanir sem hann getur tekið.“

Guðmundur staðfestir að Kristján Þór hafi ekki ráðfært sig við hann varðandi málið, en Kristján Þór hefur sagt að hann hafi gert ríkisstjórninni grein fyrir því í fyrra vor, hvernig hann hygðist vinna að málinu. Segist Guðmundur ekki muna eftir því:

„Nú bara man ég það ekki þegar hann sagði þetta á sínum tíma.“

Guðmundi finnst ekki mikið koma til skýrslu Hagfræðistofnunar Háskóla Íslands um þjóðhagsleg áhrif hvalveiða sem birt var á dögunum, en hún fékk mikla gagnrýni. Var hún var notuð til grundvallar í ákvörðun Kristjáns Þórs:

 „Ég hef gagnrýnt opinberlega hvernig haldið var á málum þar. Mér fannst hún ekki vel unnin þannig að mér finnst ennþá vanta upp á að við sjáum þetta betur út frá öðrum þáttum.“