Sjónvarpsmaðurinn Sindri Sindrason heimsótti þingkonu Sjálfstæðisflokksins, Áslaugu Örnu Sigurbjörnsdóttur í þættinum Ísland í dag, sem sýndur var í gærkvöldi á Stöð 2.
Margt forvitnilegt kom í ljós í þessari heimsókn Sindra, og voru meðal annars ummæli Áslaugar Örnu um humar og hvítvín rifjuð upp, sem vöktu mikla athygli á sínum tíma.
„Fólki fannst þetta kannski óvarlega sagt,“ segir Áslaug Arna og bætir við að hún hafi verið óreynd í viðtölum á þessum tíma. Mörg ljót ummæli voru látin falla á internetinu í tengslum við viðtalið og segir þingkonan það hafa gagnast sér vel að hafa upplifað það snemma að vera „tekin af lífi á internetinu“ eins og hún orðar það. „Ég hafði rosalega gott af þessu fyrst ég var að fara í pólitíkina.“
Áslaug Arna segist ekki hafa ætlað sér að verða þingkona svo ung, en sér ekki eftir því núna. Aðspurð um hve langt hún stefnir í stjórnmálum stendur ekki á svörunum.
„Ég vil fara langt, að sjálfsögðu,“ segir hún. „Eins langt og maður kemst.“
Sindri skoðar heimili Áslaugar Örnu í miðborg Reykjavíkur í krók og kima og sér svolítið sem hann hefur aldrei séð áður – bláa matardiska. Í raun er margt blátt hjá Áslaugu, til dæmis einn veggur, púðar og servíettur.
„Þetta er ekki flokkspólitískt,“ segir Áslaug Arna, en eins og flestir vita er blár litur Sjálfstæðisflokksins. „Þetta er bara uppáhaldsliturinn minn.“
Þá kemur einnig fram að Áslaug Arna borði ekki mikið heima fyrir og fer í raun meira fyrir víni á heimilinu en mat.
Viðtalið í heild sinni má sjá hér fyrir neðan: