Dick Van Dyke snýr aftur í framhaldsmynd um Mary Poppins. Árið 1964 lék hann Bert í Mary Poppins og á dögunum tilkynnti hann að hann hefði fengið hlutverk í nýju myndinni, Mary Poppins Returns. Ekki var þess getið hvaða persónu hann leikur þar. Myndin gerist á fullorðinsárum Jane og Michael Banks sem takast á við missi, en þá kemur Mary Poppins svífandi og töfrar taka völdin. Emily Blunt fer með hlutverk Mary Poppins og meðal annarra leikara eru Meryl Streep og Angela Lansbury. Myndin verður frumsýnd um jólin 2018. Ýmsir hafa viðrað efasemdir um að rétt sé að gera framhaldsmynd eftir jafn vinsælli mynd og Mary Poppins, en nú er bara að bíða og sjá hvernig til tekst.
Dick Van Dyke er orðinn 91 árs og segir að ekki komi til greina að hann dragi sig í hlé. „Það er það versta sem ég gæti gert,“ segir hann. Hann er í góðu formi og fer í líkamsþjálfun fimm sinnum í viku. Mótleikkona hans úr Mary Poppins, Julie Andrews, er 81 árs, en hún fékk Óskarsverðlaun fyrir frammistöðu sína í myndinni. Ekki er vitað til þess að henni hafi verið boðið hlutverk í framhaldsmyndinni.
