Það er búið að finna flugvélina sem þeir Emiliano Sala og David Ibbotson ferðuðust með frá Nantes til Cardiff.

Þeir fóru í loftið þann 21. janúar síðastliðinn en flugvélin komst aldrei á leiðarenda og hefur hrapað yfir Ermasundinu. Sala og Ibbotson voru einir um borð en sá fyrrnefndi var nýbúinn að skrifa undir samning við Cardiff í ensku úrvalsdeildinni.

Vélin fannst í gær og í dag hefur verið greint frá því að búið sé að finna eitt lík hjá vélinni, ekki hefur verið greint frá því hvort það sé Sala eða Ibbotson. Líkið sást með myndavél sem fór á hafsbotn og skoðaði vélina og þar í kring. Frekari tíðinda af þessum harmleik má vænta í dag.

Sala hafði gengið í raðir Cardiff þar sem Aron Einar Gunnarsson spilar en átti eftir að mæta á sína fyrstu æfingu. Liðið lék sinn fyrsta heimaleik eftir hvarf Sala á laugardag, þar vann liðið góðan sigur á Bournemouth.

Meira:
Sjáðu myndirnar: Flugvélin sem Sala var um borð í á hafsbotni – Búið að greina lík í vélinni

Eftir leik labbaði Neil Warnock um völlinn með tárin í augunum og klappaði fyrir stuðningsmönnum Cardiff. Neil Asthon blaðmaður á Englandi, telur að Warnock gæti sagt upp störfum og hætt í fótbolta í vikunni. Þessi hræðilegi harmleikur hefur haft mikil áhrif á hann.

,,Neil Warnock virtist vera við það að segja stuðningsmönnum Cardiff að hann væri hættur að þjálfa,“ sagði Asthon.

,,Warnock hefur sagt að hann var nálægt því að hætta eftir að flugvélin með Sala hvarf.“

,,Warnock grét þegar hann gekk um völlinn og það lítur út fyrir að hann muni hætta í vikunni, það gæti eitthvað stórt gerst á næstu dögum.“