Sólveig Káradóttir fatahönnuður og tónlistarmaðurinn Dhani Harrison, sonur Bítilsins George Harrison, eru að skilja. Þau Sólveig og Dhani gengu í hjónaband árið 2012 en Sólveig er dóttir Kára Stefánssonar, forstjóra Íslenskrar erfðagreiningar.

Samkvæmt frétt TMZ var það Dhani sem sótti um skilnaðinn í Los Angeles í síðustu viku og var ástæðan sögð vera óyfirstíganlegur ágreiningur þeirra á milli. Eignum þeirra hjóna verður skipt samkvæmt kaupmála sem undirritaður var áður en þau gengu í hjónaband.

Sólveig og Dhani giftu sig á sveitasetri George Harrison í Friar Park í júní 2012 en þá höfðu þau verið saman í nokkur ár. Meðal gesta í brúðkaupinu voru leikararnir Tom Hanks og Clive Owen samkvæmt frétt Mail Online. Auk þeirra voru Bítlarnir Ringo Starr og Sir Paul McCartney meðal gesta en George Harrison, faðir Dhani, lést sem kunnugt er árið 2001.

Í brúðkaupinu klæddist Sólveig glæsilegum kjól sem var hannaður af Stellu McCartney, dóttur Pauls, og gekk Sólveig upp að altarinu undir lagi Led Zeppelin, The Rain Song. Brúðkaupið vakti mikla athygli og var meðal annars fjallað um það í tímaritinu Vogue.