Samtök ferðaþjónustunnar krefjast þess að fyrirhugaðar breytingar á virðisaukaskatti á ferðaþjónustu, sem greint er frá í fjármálaáætlun ríkisstjórnar Sjálfstæðisflokks, Viðreisnar og Bjartrar framtíðar til fimm ára verði slegnar af. Samtökin segja að þessar skattahækkanir muni valda því að ferðamenn stoppi skemur á landinu og halda sig í meira mæli á suðvestanverðu landinu.

Umsögn samtakanna um fjármálaáætlunina var birt í dag og var hún kynnt fyrir efnahags- og viðskiptanefnd í morgun og í kjölfarið var haldin blaðamannafundur. Samtökin gerðu könnun á meðal félagsmanna sinna og þar kom fram mikil andstaða við breytingarnar. Telja hvorki meira né minna en 90% fyrirtækja að breytingarnar muni hafa neikvæð áhrif á rekstur þeirra og heil 70% að áhrifin verði mjög neikvæð.

Helga Árnadóttir er framkvæmdastjóri SAF. Á blaðamannafundinum sagði hún að alvarlegar athugasemdir væru gerðar af hálfu samtakanna við að ekkert samráð hefði verið haft við samtökin eða fyrirtæki í greininni. Samtökin hafi fengið kynningu á þessu klukkustund áður en breytingarnar voru kynntar opinberlega og fengið fjóra daga til að skila inn umsögnum. Þetta segir Grímur Sæmundson, formaður samtakanna, að sé mikil óvirðing í garð ferðaþjónustunnar sem er orðin stærsta útflutningsgrein landsins.

Benedikt sagði í þættinum Eyjunni á ÍNN í gærkvöldi að ríkisstjórnin hygðist ekki bakka með fyrirætlanir sínar um að hækka ferðaþjónustuna upp í 24% virðisaukaskattþrep úr 11% en þessi breyting á að taka gildi 1. júlí 2018. Þessi hækkun tekur þó ekki til veitingaþjónustu sem verður áfram í neðra þrepi líkt og matvörur.