Marcus Rashford segist vilja vera áfram hjá Barcelona eftir frábært tímabil á láni frá Manchester United.

Rashford varð í gær spænskur meistari með Barcelona eftir 2-0 sigur á Real Madrid þar sem Englendingurinn skoraði glæsilegt aukaspyrnumark.

Barcelona hefur kauprétt á Rashford upp á 26 milljónir punda, en óvíst er hvort félagið muni virkja ákvæðið vegna launakostnaðar leikmannsins. Einnig hefur verið rætt og ritað um að hann gæti komið aftur á láni.

Rashford var spurður út í framtíð sína eftir leikinn og svaraði á léttu nótunum.

„Ég veit það ekki. Ég er enginn töframaður, en ef ég væri það myndi ég velja að vera áfram hér,“ sagði Englendingurinn.

Sóknarmaðurinn hefur skorað 14 mörk og lagt upp önnur 14 á tímabilinu og segist njóta sín vel hjá félaginu.

„Ég kom hingað til að vinna titla. Þetta lið á eftir að vinna mikið meira á næstu árum og það væri sérstakt að vera hluti af því.“