Chet Hanks er leikari, fyrirsæta en umfram allt tónlistarmaður og sagði hann einmitt skilið við Hollywood til að einbeita sér að tónlistarferlinum. Hann býr nú í hjólhýsagarði í Tennessee og sér ekki eftir þeirri ákvörðun – enda bæði einfaldur og hagkvæmur búsetukostur.
Chet, sem er 35 ára, ræddi búsetuna í viðtali í The Tonight Show með Jimmy Fallon á dögunum. Þar sagði hann að hann hefði ekki viljað flytja inn í aðra íbúð eftir að hafa nýlega eytt tíma og peningum í að innrétta heimili sitt í Los Angeles.
„Mig langaði ekki að standa í því aftur,“ sagði hann og bætti við að leiguhúsnæði sem hann hafði prófað fyrst eftir flutningana hefði fljótt orðið þreytandi.
Í stað þess ákvað hann að kaupa hjólhýsi sem hann segir uppfylla allar þarfir sínar. Hann lýsti því að hann hefði eigið eldhús og rúmgóða sturtu, sem væri sjaldgæft í slíkum vögnum.
Chet lagði áherslu á að hjólhýsagarðurinn þar sem hann býr væri rólegur og langt frá því að vera óöruggur eða niðurníddur. Þar byggi að mestu eldra fólk og sagðist hann líklega vera langyngsti íbúinn á svæðinu.
Í myndbandi sem hann birti á Instagram í mars svaraði hann einnig gagnrýni fólks sem velti fyrir sér af hverju sonur eins þekktasta og ríkasta leikara heims byggi í hjólhýsi.
Hann sagði lífsstílinn bæði ódýran og frelsandi og upplýsti að hjólhýsið hefði kostað um 30 þúsund dali, 3,6 milljónir króna, en mánaðarleigan fyrir stæðið væri aðeins um 50 þúsund krónur.
Þá gagnrýndi hann það sem hann kallaði „hustle-menningu“ sem vísar til kröfunnar til fólks um að það vinni meira og græði meira. Hvatti hann fólk til að hugsa betur um hvað það vilji raunverulega fá út úr lífinu.
„Hver er draumurinn? Að keyra Rolls Royce?“ spurði hann og bætti við að efnislegir hlutir skilgreindu ekki hamingju. Að hans mati felst hamingjan í því sem fólk framkvæmir, en ekki því sem það eignast.
