„Hahhaha djöfull er hún að láta taka sig,“ segir myndarlegi drengurinn sem heldur á snjallsímanum og sýnir mér myndbandið. „Djöfull maður, hún stynur eins og ég veit ekki hvað. Hah – og allir geta horft. Hahahhaha.“ Hann gefur frá sér frekar unglingaleg strákahljóð – glaðhlakkalegur.

Ég kíki á símann hans og sé þar konu og karl í samförum inni á opnum klósettbás. Einhver hefur dregið upp snjallsímann sinn og tekið upp samfarir drukkins fólks inni á skemmtistað. Ekki nóg með það – heldur hefur sá sem gerði upptökuna ákveðið að góð hugmynd væri að senda hana áfram á aðra snjallsíma. Þannig hafði myndbandið ferðast inn í síma drengsins og komið fyrir augu mín á endanum.
Ég hristi hausinn, ranghvolfi augum og spyr hvaða fávitar séu að deila svona löguðu. Held svo áfram að vinna í tölvunni minni þar sem ég sit á kaffihúsinu á næsta borði við þennan kunningja minn. Til að setja málið í samhengi er vert að geta þess að hann er afskaplega hægri sinnaður, tjáir sig reglulega um aðdáun sína á Trump, og andúð sína á femínistum. Hann telst líka fullorðinn.
Hann gengur aftur að sætinu sínu í dýru íþróttatískuskónum, fær sér sopa af prótíndrykknum setur á sig Beats by Dre heyrnartólin og virðist halda áfram að vinna í sinni tölvu.

Eftir nokkrar mínútur kemur nafn dreifanda myndbandsins út úr munninum – fram hjá beinu tönnunum og út í opna rýmið á kaffihúsinu. Eyrun mín taka ekki við því – ég held áfram að vinna.
Þegar hann stendur upp, snýr sér að mér og tilkynnir hróðugur fullt nafn stelpunnar sem er að „láta taka sig“ á salerni skemmtistaðarins er mér nóg boðið.
„Hvers vegna í ósköpunum ertu að grafa upp og tilkynna mér þetta nafn?“ spyr ég. „Heldurðu að hún hafi samþykkt þessa dreifingu myndbandsins – já eða upptökuna á þessu?“
„Huh,“ segir hann og tyggur sitt tyggjó og glottir, „maður þarf nú kannski aðeins að passa hvar maður ríður.“

Ókeiiiii – erum við stödd hérna aftur? Í alvöru? Ekki nema viku eftir að ég skrifaði þennan pistil til mannsins sem sagði að það væri einhvers konar náttúrulögmál fyrir karlmenn að birta kynlífsefni í óþökk fyrrverandi ástkvenna sinna er samböndum lyki. Í alvöru?
Þetta kallast hrelliklám eða stafrænt kynferðisofbeldi. Dreifing þess varðar við lög.
Athugaðu það áður en vinir þínir senda þér næsta svona myndband. Þú berð ábyrgð. Ekki vera fáviti!