Natalie Weaver og kærasti hennar Stephen Hall voru búin að ákveða að eiga skemmtilegan sunnudag saman. Nema hvað að Stephen kom heim blindfullur nóttina áður og svaf eins og steinn í gegnum daginn. Natalie var frekar svekkt að plön dagsins væru ónýt og ákvað að hefna sín á meistaralegan hátt. Þar sem hann svaf svo fast þá tókst henni að farða hann, gerviaugnhár og allt, og maður getur ekki annað en sagt að útkoman sé stórglæsileg.
Þegar Stephen vaknaði næsta morgun þá beið hans óvæntur glaðningur þegar hann kíkti í spegilinn. „Hann var mjög hissa og spurði hvað hafi gerst. Ég reyndi að sannfæra hann að hann hafi komið heim svona,“ sagði Natalie við Daily Mail.
„Það var mikill hlátur en hann var ekki reiður. Ég er hissa að hann svaf í gegnum allan hláturinn. Ég var í brjáluðu hláturskasti. Þetta var klikkað.“
Héðan í frá mun Stephen hugsa sig tvisvar um áður en hann endurtekur atvikið sagði Natalie. Sjáðu atburðarásina hér fyrir neðan.
