Líkt og fram hefur komið í fréttum þá eru Harry Bretaprins og leikkonan Meghan Markle trúlofuð og brúðkaup fyrirhugað næsta vor. Tilkynning um trúlofun þeirra kemur vikuna eftir að Elísabet Bretadrottning fagnaði 70 ára brúðkaupsafmæli sínu.

Harry segist hafa vitað að Markle væri sú rétta, fyrsta daginn sem þau hittust.

Nánari dagsetning og staðsetning er ekki ljós enn sem komið er, en talið er að þau muni bíða með brúðkaup þar til Vilhjálmur Bretaprins og Katrín hertogaynja hafa eignast sitt þriðja barn, en von er á því í apríl.

Harry valdi Sunken garðinn við Kensington höll sem staðsetningu fyrir fyrstu opinberu myndatökurnar af parinu, en móðir hans, Díana prinsessa elskaði staðinn. En hann heiðraði minningu móður sinna á fleiri vegu, trúlofunarhringur Markle er hannaður af Harry sjálfum og inniheldur tvo demanta sem voru í eigu móður hans. Harry bað Markle eftir að hann fékk blessun drottningarinnar ömmu sinnar og foreldra Markle.

Parið tilkynnti fyrir ári síðan að þau væru í sambandi, en þá höfðu þau hist á leynd í fjóra til sex mánuði.

Markle er að flytja allar eigur sínar frá Toronto til London og mun parið búa í Nottingham Cottage við Kensington höll rétt hjá Vilhjálmi prins og fjölskyldu hans.