Mikil sorg ríkir í pólsku knattspyrnusamfélagi eftir að hinn 16 ára gamli Piotr Dawid lést skyndilega. Hann þótti mikið efni og lið á Ítalíu höfðu sýnt honum áhuga.

Piotr lék með akademíu pólska félagsins Ruch Radzionków og stundaði nám við íþróttaskóla í bænum Radzionków. Fréttirnar af andláti hans hafa vakið mikla samúð meðal liðsfélaga, þjálfara og vina hans.

Faðir hans, tónlistarmaðurinn Tomasz „Haja“ Dawid er þekktur rokkari í Póllandi, staðfesti andlátið á samfélagsmiðlum með hjartnæmri færslu ásamt svarthvítri fjölskyldumynd.

„Sonur minn, heimurinn okkar hrundi í dag. Heimurinn er ósanngjarn. Við munum alltaf muna þig sem glaðan og brosandi dreng fullan af góðmennsku,“ skrifaði hann.

Hann bætti við. „Við munum alltaf elska þig.“

Skólinn og akademía félagsins sendu einnig frá sér sameiginlega yfirlýsingu þar sem Piotr var minnst með hlýjum orðum. „Piotr verður í minningum okkar sem brosmildur, hjálpsamur og góður einstaklingur. Hann færði samfélaginu hlýju og vinsemd og var vinur sem alltaf var hægt að treysta á,“ sagði meðal annars í yfirlýsingunni.

Fjölskyldan hefur ekki gefið upp dánarorsök og hefur óskað eftir friðhelgi á þessum erfiða tíma. Andlát hins unga leikmanns hefur skekið bæði félagið og nærumhverfi hans enda þótti Piotr afar efnilegur bæði innan vallar og utan.