Marinó G. Njálsson, ráðgjafi og samfélagsrýnir, furðar sig á þrjósku veghaldara á höfuðborgarsvæðinu hvað varðar götusópun. Vegagerðin, borgar og bæjarsjóðir hafa sparað sér fúlgur í snjómokstur í vetur en senda þó ekki götusóparana út til að draga úr hinu mikla ryki sem myndast í stillunni.
„Þessi vetur hefur verið einstaklega hagstæður fyrir borgarsjóð og marga bæjarsjóði, a.m.k. á SV-horninu. Ekki má gleyma Vegagerðinni. Varla hefur fallið snjókorn af himni eftir að vetur gekk í garð og ekki verið mikil þörf á snjómokstri,“ segir Marinó í færslu á samfélagsmiðlum. „Í staðinn er annar fjandi að angra íbúa víða, sem er hið mikla ryk sem er á götum.“
Í gær fór gildi grófs svifryks við Grensásveg í um það bil 220 míkrógrömm á rúmmetra. Sólarhringsheilsuverndarmörk eru 50 míkrógrömm.
„Reykjavíkurborg hvetur fyrirtæki til að halda fólki heima, svo borgin geti sparað krónur sem annars færu í götuþrif,“ segir Marinó. „Svo sem ekki nýtt, að stjórnendur borgarinnar hafi ekki áttað sig á því, að hægt er að nota götusópara til að draga úr ryki. Kannski óþarfi að benda bara á stjórnendur í Reykjavík, því ég get ekki séð að þeir í Kópavogi séu neitt skarpari.“
Spyr hann af hverju þetta sé. Það er hvort verið sé að bíða eftir næstu rigningu til að skola rykinu í burtu.
„Ekki fer hún með snjónum, því hann hylur bara rykið og breytir því svo í drullu. Hvorutveggja, rykið eða drullan, sest svo á bílana, sem aka um göturnar, og hef ég líklega aldrei séð eins mikið af eins skítugum bílum og þessar vikurnar,“ segir hann og bendir á annað vandamál, óþarfa vandamál. „Og vegna þess að sveitarfélögin skilja ekki samhengið á milli götusópara og þess að losna við rykið, þá þurfa bíleigendur að þvo bíla sína oftar. Það er svo sóun á vatni og veldur óþarfa mengun.“
Skorar hann á bæði Vegagerðina og sveitarfélögin að hleypa götusópurunum út á vegina. Byrja þurfi að þrífa þær götur sem þungaumferð fer um. Einn sæmilega þungur bíll, svo sem vörubíll eða strætisvagn, eys upp miklu ryki sem setjist á bílana sem á eftir koma eða þá yfir gangandi vegfarendur sem ætluðu sér kannski í heilsubótargöngu.
„Satt best að segja, þá finnst mér þessi þrjóska vegahaldara í þéttbýlinu hérna á höfuðborgarsvæðinu vera stór furðuleg,“ segir Marinó að lokum. „Keyrt er um götur með rykbindiefni í staðinn fyrir að nýta vel þekkta tækni í formi götusópara. Hysjið upp um ykkur buxurnar og látið hendur standa fram úr ermum. Munið að það eru kosningar í vor og það gæti tryggt atkvæði að gera göturnar þrifalegri!“
