Borin hafa verið kennsl á rotnandi lík sem fannst í yfirgefinni Teslu söngvarans D4vd í Kaliforníu mánudaginn 8. september. Um unglingsstúlku er að ræða að sögn yfirvalda í Los Angeles á þriðjudag. Bifreiðin hafði verið haldlögð af yfirvöldum í vikunni á undan og flutt á bifreiðastæði á hennar vegum.

Lík stúlkunnar var vafið inn í plast og var í læstu skotti Teslunnar, þar sem sólin skein á bílinn í hitanum í Kaliforníu í að minnsta kosti fimm daga. Líkið var svo illa rotnað að það var ekki alveg heilt og var tilkynning til yfirvalda á þá leið að mikla ólykt lagði frá bílnum.

D4vd, sem heitir löglega David Anthony Burke, var tengdur málinu eftir að yfirvöld röktu bílnúmer Teslunnar með Texas-númeraplötunni við hann. Hann hafði ekki tilkynnt bifreiðina stolna.

Stúlkan hét Celeste Rivas og var 15 ára gömul. Hún hafði horfið árið 2024 frá Lake Elsinor í Kaliforníu-ríki.

Athygli hefur vakið að hún var með húðflúr á hægri vísifingri sem á stóð „Shhh…“ sem er samskonar húðflúr og Burke skartar, rétt eins og fleiri stjörnur eins og Rihanna og Lindsay Lohan.

Burke hefur sýnt fullt samstarf við lögregluna á meðan hann heldur tónleikaferðalagi sínu áfram.

Þegar líkið fannst í bílnum var Burke að undirbúa tónleika í Minneapolis og hafði verið að deila stöðugum færslum með tveimur milljónum fylgjenda sinna á Instagram.

Þrátt fyrir fullt samstarf við yfirvöld hefur ferill hans borið hnekki vegna málsins. Fyrirtækið Crocs og Hollister sleit samstarfi þeirra aðeins nokkrum dögum eftir að tilkynnt var að Burke væri andlit samstarfsverkefnisins „Dream Drop“. Myndirnar af vörunni sem Burke var fyrirsæta fyrir voru allar birtar, en andlit hans var klippt burt.