Sú saga gengur fjöllunum hærra að Harry Bretaprins sé að undirbúa gerð heimildarmyndar um móður sína heitna, Díönu prinsessu. Er efni myndarinnar lýst þannig að „sprengjum“ verði varpað. Allt verði látið flakka og ekkert dregið undan. Harry mun hins vegar hafa verið varaður við að gera myndina með þessum efnistökum enda geti það verið „hættulegt“.

Mirror greinir frá þessu. Samkvæmt sögusögnum á heimildarmyndin að vera hluti af samstarfi Harry og eiginkonunnar Meghan við efnisveiturisann Netflix en tilkynnt var nýlega um nýjan samning fyrirtækisins við hjónin.

Verði virkilega af gerð myndarinnar mun stefnan vera sú að frumsýna hana árið 2027 þegar 30 ár verða liðin frá dauða Díönu.

Heimildarmaður innan kvikmyndaiðnaðarins fullyrðir hins vegar að Netflix muni aldrei samþykkja gerð myndarinnar og hvað þá sýna hana.

Prinsinn og efnisveitan hafa hvorugt staðfest að myndin sé í vinnslu. Richard Fitzwilliams sérfræðingur í málefnum bresku konungsfjölskyldunnar segir að ef myndin verði gerð með þessum efnistökum séu sættir milli Harry og konungsfjölskyldunnar útilokaðar og það sé mesta hættan við myndina.

Fitzwilliams segir hins vegar ljóst að móðir Harry hafi verið honum afar kær og því sé afar skiljanlegt að hann vilji gera heimildarmynd í þessum anda um hana. Harry hafi hins vegar gefið til kynna að hann vilji sættast við fjölskyldu sína eftir deilur og stirð samskipti undanfarinna ára. Geri hann heimildarmynd með þessum efnistökum sé hins vegar ljóst að veruleg hætta sé á að allar sáttaumleitanir fari út um þúfur