Anthony Martial hefur yfirgefið Monterrey eftir að samningi hans við félagið var rift fyrir tímann.

Franski framherjinn, sem er 30 ára, gekk til liðs við Monterrey í september á síðasta ári en dvöl hans þar varð skammvinn og vonbrigðum blandin. Hann skoraði aðeins eitt mark og lagði upp þrjú í 20 leikjum áður en ákveðið var að slíta samstarfinu.

Tímabil Martial í Mexíkó einkenndist einnig af meiðslum, en hann fór af velli á börum eftir axlarmeiðsli fyrr á árinu. Þá komu upp agavandamál þegar hann sýndi óánægju með að sitja á varamannabekk í leik gegn Chivas, sem leiddi til þess að hann var settur til hliðar frá æfingum liðsins.

Ferill Martial hefur verið sveiflukenndur undanfarin ár, en hann sló í gegn með Manchester United eftir komu sína þangað 2015.

Nú er framtíð hans enn á ný í óvissu eftir enn eitt vonbrigðatímabilið.