Bjarni Helgason, stjörnublaðamaður Morgunblaðsins og stuðningsmaður Liverpool óttast þær breytingar sem eru að eiga sér stað á Anfield.

Arne Slot var rekinn úr starfi á laugardag og er félagið nú að ganga frá ráðningu á Andoni Iraola frá Bournemouth.

Iraola hefur gert vel með Bournemouth en Bjarni hræðist þetta skref. „Ég var vissulega kominn með nóg af Arne Slot og var sjálfur búinn að kalla eftir þjálfarabreytingum á Anfield eftir allt of algenga hörmungarframmistöðu á nýliðnu tímabili,“ skrifar Bjarni í Morgunblað dagsins.

Hann segir söguna ekki í liði með Iraola. „Sagan og tölfræðin er hins vegar ekki beint með Iraola í liði, allavega ekki ef við horfum til stjóra sem hafa tekið skrefið frá minna félagi yfir í stærra í ensku úrvalsdeildinni í seinni tíð.“

„Thomas Frank færði sig yfir til Tottenham frá Brentford og var rekinn. Graham Potter fór frá Brighton til Chelsea og var rekinn. David Moyes tók við Manchester United eftir að hafa stýrt Everton og var rekinn. Roy Hodgson tók við Liverpool eftir að hafa stýrt Fulham og var rekinn.“

Bjarni segir að aðrir stjórar hafi gert þetta en óttast að Iraola höndli ekki starfið á Anfield. „Það fylgir því allt önnur pressa að stýra einu af stærstu liðum Bretlandseyja samanborið við eitthvert miðlungslið í úrvalsdeildinni. Pressa sem margir stjórar virðast eiga erfitt með að höndla.“