Yan Diomande, kantmaður RB Leipzig, hefur kveikt í orðrómi um möguleg félagaskipti til Paris Saint-Germain eftir ummæli sín í viðtali við franska miðilinn Telefoot.

Diomande er einn eftirsóttasti ungi leikmaður Evrópu um þessar mundir og hefur meðal annars verið orðaður við Liverpool. PSG hefur einnig fylgst náið með framgöngu hans og nú virðist leikmaðurinn sjálfur ekki útiloka flutning til Frakklands.

„Það væri ánægja að spila þar, hjá einu stærsta félagi heims. Ég hef áður spilað í Frakklandi og held að aðlögunin yrði ekki erfið. Af hverju ekki?“ sagði Diomande.

Hann lagði þó áherslu á að hann væri enn leikmaður RB Leipzig og væri einbeittur að verkefnum sínum hjá þýska félaginu.

Diomande viðurkenndi einnig að hann hefði sérstök tengsl við PSG í gegnum fjölskylduna.

„Pabbi minn styður PSG, þannig að það var frábært að sjá liðið vinna Meistaradeildina aftur,“ sagði kantmaðurinn.

Þegar hann var spurður beint hvort hann myndi vilja spila fyrir PSG svaraði hann stuttlega. „Já, mér líkar mjög vel við félagið.“

Ummælin munu eflaust ýta undir vangaveltur um framtíð leikmannsins, en ljóst er að stór félög fylgjast grannt með stöðu hans fyrir sumarið.