Roma hefur mikinn áhuga á að fá Mason Greenwood til félagsins og er Gian Piero Gasperini, knattspyrnustjóri ítalska liðsins, sagður vera mikill aðdáandi enska sóknarmannsins.

Samkvæmt fréttum er Roma tilbúið að hefja viðræður við Marseille um kaup á Greenwood og gæti boðið meira en 43 milljónir punda fyrir leikmanninn.

Marseille vill fá sem hæsta upphæð fyrir hinn 24 ára gamla framherja, sem átti sterkt tímabil í Frakklandi eftir að hann yfirgaf Manchester United.

Ef af sölunni verður gæti Manchester United hagnast verulega þrátt fyrir að eiga leikmanninn ekki lengur. Þegar Greenwood var seldur til Marseille samdi enska félagið um háa endursöluklausu sem talin er vera á bilinu 40 til 50 prósent af hagnaði af næstu sölu.

Það þýðir að stór hluti af mögulegri félagaskiptaupphæð gæti ratað aftur í kassann á Old Trafford.

Næstu vikur gætu því orðið áhugaverðar þar sem Roma undirbýr sig fyrir að gera formlega tilraun til að landa Greenwood.