Enska fyrirsætan og áhrifavaldurinn Ella Buffin verður á meðal áhorfenda á Heimsmeistaramótinu í Norður-Ameríku í sumar, en hún mun fylgja kærasta sínum, Micky van de Ven, varnarmanni Tottenham og hollenska landsliðsins.

Buffin, sem er 24 ára gömul og með tæplega eina milljón fylgjenda á samfélagsmiðlum, hefur verið orðuð við Van de Ven undanfarna mánuði. Parið sást nýverið saman í fríi á Spáni þar sem þau nutu samveru í Marbella áður en Van de Ven hélt til móts við hollenska landsliðið.

Þrátt fyrir að vera ensk mun Buffin að öllum líkindum styðja Holland á mótinu, enda leikur kærasti hennar lykilhlutverk í liði Hollendinga. Van de Ven vonast til að gleyma erfiðu tímabili með Tottenham og festa sig í sessi í byrjunarliði Hollands á Heimsmeistaramótinu.

Hinn 23 ára gamli miðvörður er talinn líklegur til að mynda miðvarðapar með fyrirliðanum Virgil van Dijk.

Buffin deildi nokkrum myndum frá ferð þeirra á Instagram en Van de Ven sást ekki á þeim. Breskir fjölmiðlar náðu þó myndum af parinu á veitingastaðnum The Grill í Marbella þar sem þau eyddu saman nokkrum klukkustundum yfir kvöldverði.