Manchester United gæti staðið frammi fyrir enn einum eigendaskiptunum á næstunni, samkvæmt nýjustu fregnum.

Samkvæmt heimildum Bloomberg eru sumir meðlimir Glazer-fjölskyldunnar farnir að íhuga að selja hlut sinn í félaginu eftir meira en 20 ár við stjórnvölinn.

Glazer-fjölskyldan tók yfir United árið 2005, en hefur lengi verið umdeild meðal stuðningsmanna.

Greint er frá því að innan fjölskyldunnar séu skiptar skoðanir og að sumir vilji selja hluti sína að hluta eða öllu leyti. Viðræður hafa þegar átt sér stað milli aðila um mögulega sölu.

Fréttirnar höfðu strax áhrif á hlutabréf félagsins, sem hækkuðu um sjö prósent og meta nú félagið á um 2,7 milljarða punda.

Þetta gerist tveimur árum eftir að Jim Ratcliffe keypti stóran hlut í félaginu og tók yfir stjórn knattspyrnumála.

Óvissa ríkir því áfram um framtíð eignarhaldsins á Old Trafford.