Rúmar átta milljónir Þjóðverja horfðu á leik Englendinga og Skota síðastliðið föstudagskvöld á Evrópumótinu í knattspyrnu og brá flestum þeirra í brún. Jadon Sancho fékk ekki að spila eina mínútu fyrir Englendinga annan leikinn í röð.

Þjóðverjar hafa fylgst með Sancho í Bundesligunni síðustu ár þar sem hann hefur verið frábær. Þýskir aðdáendur vonast til að sjá Sancho í lokaleik Englendinga í riðlakeppninni á þriðjudag og gæti verið að hann fái tækifæri í þeim leik.

„Við höfum frábæra möguleika frammi og margir eru ungir og á stórmóti í fyrsta skipti. Við verðum að vera raunsæir varðandi þá leikmenn,“ sagði Southgate á blaðamannafundi.

„Jadon á alveg möguleika á að spila næsta leik. Hann hefur æft vel síðustu daga. Við eigum eftir að taka ákvörðun.“

Margir hafa furðað sig á því að Sancho hafi ekki enn fengið að spila á EM þar sem sóknarleikur Englendinga hefur ekki verið upp á marga fiska.

„England hljóta að hafa bestu sóknarlínuna í Evrópu. Öðruvísi get ég ekki útskýrt hvers vegna Jadon Sancho hefur ekki fengið mínútu á Evrópumótinu hingað til,“ sagði Patrick Berger á Twitter.