Enska knattspyrnufélagið Everton hefur staðfest að leikmaðurinn sem var handtekinn á dögunum sé leikmaður sem spilar með aðalliði félagsins. Þetta kemur fram í yfirlýsingu frá félaginu, sem er eftirfarandi:
„Everton staðfestir að félagið hefur vikið leikmanni úr starfi vegna lögreglurannsóknar. Félagið mun halda áfram að aðstoða yfirvöld við rannsókn málsins og greiða úr fyrirspunum þeirra. Félagið mun ekki gefa út frekari yfirlýsingar að svo stöddu.“
31 árs leikmaður í ensku úrvalsdeildinni grunaður um kynferðisbrot gegn barni
Líkt og komið hefur fram er um að ræða 31 árs leikmann sem spilar í ensku úrvalsdeildinni. Greint hefur verið frá því að húsleit hafi verið gerð á heimili leikmannsins í þessum mánuði. Síðastliðinn föstudag hafi hann svo verið tekinn til yfirheyrslu hjá lögreglu en látinn laus að henni lokinni.
Í fréttum hefur komið fram að hald hafi verið lagt á marga muni í húsleitinni og lögregla hafi lagt spurningar fyrir leikmanninn í tengslum við meint alvarleg afbrot.