Arsenal skoðar þann möguleika að fá Tom Heaton, varamarkvörð Aston Villa til félagsins nú í janúar. Frá þessu greina ensk blöð í dag.
Arsenal vill fá inn markvörð í janúar en félagið seldi Emiliano Martinez til Aston Villa síðasta sumar og fékk þá Rúnar Alex Rúnarsson inn.
Sagt var frá því í The Athletic í vikunni að Arsenal myndi vilja lána Rúnar Alex í neðri deild Englands eða til liðs í Evrópu. Arsenal leitar að markverði til að keppa við Bernd Leno, David Ornstein segir að Arsenal hafi alltaf hugsað um Rúnar sem þriðja kost sinn í markið.
Rúnar var keyptur til Arsenal síðasta sumar frá Dijon, eftir fína byrjun í Evrópudeildinni gerði Rúnar Alex mistök í deildarbikarnum gegn Manchester City. Þau mistök hanga eins og skuggi yfir honum þegar ensk blöð fjalla um málefni hans.
Heaton hefur mikla reynslu og segir í fréttum eð Arsenal horfi á hann sem kost til skamms tíma á meðan Rúnar Alex öðlast reynslu og að félagið hafi þá meiri tíma til að finna annan og betri kost til að keppa við Bernd Leno.
