Kári Árnason sem hefur átt fast sæti í íslenska landsliðinu síðustu ár gerir upp ferill sinn í Draumaliðinu hjá Jóa Skúla.
Kári velur draumalið sitt af ferlinum en hann ræðir einnig um ferilinn í heild. Auk þess að velja góða samherja fer hann yfir atvik sem komið hafa upp á ferli sínum.
Kári var í herbúðum Plymouth frá 2009-2011 en var í raun rekinn frá félaginu þegar hann neitaði að gefa eftir laun sín. Plymouth hafði ekki átt pening í fleiri mánuði og Kári ekki fengið laun sín.
„Þetta tekur enda um sumarið og við erum ekki búnir að fá borgað í 6-7 mánuði. Ég er úti á golfvelli og fæ tölvupóst að ég eigi að skrifa undir pappíra. Ég átti að skila þeim klukkan tvö og ég fékk póstinn klukkan 12,“ sagði Kári við Jóhann Skúla.
Kári var úti á golfvelli og ætlaði sér að klára hringinn. „Ég tók þá ákvörðun að ég nennti þessu ekki. Ég sagði nei, ég ætla ekki að gera það. Aðallega af því ég nennti ekki að koma mér heim úr golfi til þess að skrifa upp á pappíra um að mig langaði ekki í launin.“
Þegar Kári hafnaði því að skerða laun sín þá var hann rekinn. „Þá fékk ég póst um að samningnum hefði verið rift á staðnum. Þeir ráku mig sem er ólöglegt. Þetta endaði með því að þeir skulduðu mér það sem þeir borguðu ekki í sjö mánuði plús þetta eina ár sem ég átti eftir.“