Hörður Snævar Jónsson skrifar frá Peralada á Spáni:

Íslenska landsliðið æfði í annað sinn í Katalóníu nú í morgun en leikmenn liðsins komu saman í gær. Undirbúningur fyrir undankeppni EM er í fullum gangi.

Liðið æfir í Peralada á Spáni í dag og á morgun og heldur síðan til Andorra snemma á fimmtudag, þar er leikur gegn heimamönnum á föstudag.

Allir leikmenn íslenska liðsins voru með á æfingu liðsins og sagði Freyr Alexandersson, aðstoðarlandsliðsþjálfari að langt væri síðan að íslenski hópurinn hefði verið í jafn góðu standi.

Athygli vakti að Jóhann Berg Guðmundsson, kantmaður Burnley æfði með hlífar á kálfunum sínum. Jóhann er ögn stífur eftir leik með Burnley um helgina, samkvæmt teyminu í kringum liðið þarf ekki að hafa áhyggjur af þáttöku hans í leiknum á föstudag.

Liðið fær svo frí eftir hádegi í dag og æfir aftur á morgun en ljóst er að talsverð pressa er á liðinu að vinna leikinn á föstudag.