„Hvað veldur því að matarkarfan á Íslandi er langdýrust miðað við hin Norðurlöndin. Meira að segja 40% dýrari en í Noregi þar sem kaupgjald er þó hærra.“

Þetta segir Jón Magnússon hæstaréttarlögmaður og fyrrverandi þingmaður í færslu á Facebook-síðu sinni. Tilefnið er verðkönnun ASÍ sem sýndi að matvöruverð á Íslandi er miklu hærra en á hinum Norðurlöndunum. Er vörukarfan 67 prósentum dýrari í Reykjavík en í Helsinki í Finnlandi þar sem hún var ódýrust.

Jón var þingmaður árin 2007 til 2009 þar sem hann sat fyrir Frjálslynda flokkinn og Sjálfstæðisflokkinn.

Jón segir að það sé meira hagsmunamál fyrir íslensku þjóðina að berjst gegn okrinu. Það sé mun mikilvægara en litlar launahækkanir í komandi kjarasamningum.

„Meðan íslenska ríkisstjórnin gerir ekkert í málinu þá er hún að svíkja borgara síns eigin þjóðfélags. Berjumst gegn okrinu og dýrtíðinni. Það er miklu mikilvægara en nokkurra krónu hækkun í launaumslagið.“

„Neytendasamtökin ættu að krefjast fundar þegar í stað með ríkisstjórninni og segja nú er komið nóg. Íslenskri neytendur eiga rétt á að njóta svipaðs verðlags og lánakjara og fólk á hinum Norðurlöndunum. Allt annað er óásættanlegt og sé ríkisstjórnin ekki tilbúin til að vinna í málinu þá er hún líka óásættanleg.“

Sjá einnig: 

Vilhjálmur: Sjáðu hvað íslenska fjölskyldan borgar mikið meira en fjölskyldan á Norðurlöndum