Ágúst Ólafur Ágústsson, þingmaður Samfylkingarinnar, segir að misræmið í frásögn sinni og Báru Huldar Beck byggi á ólíkri upplifun þeirra af atburðunum. Ágúst Ólafur tók sér tveggja mánaða leyfi frá þingstörfum vegna málsins og sendi frá sér yfirlýsingu síðastliðinn föstudag. Bára Huld skrifaði svo yfirlýsingu í morgun þar sem hún sagði hann fara með rangfærslur og hún hafi talið að hann hafi ætlað koma í vef fyrir að málið færi lengra.

Sjá einnig: „Í hvert sinn sem ég neitaði honum þá niðurlægði hann mig“

Ágúst Ólafur segir í skeyti sem hann sendi DV:

„Ætlun mín var aldrei sú að rengja hennar frásögn eða draga úr mínum hlut. Misræmið sem hún rekur í svari sínu byggir á ólíkri upplifun. Ég lagði mikla áherslu á í okkar samtölum og í framburði mínum hjá trúnaðarnefndinni að gangast við minni hegðun. Hennar upplifun er auðvitað aðalatriðið í þessu máli.

Ég er í dag að leita mér faglegrar aðstoðar vegna hegðunar minnar og róta hennar. Ég bið Báru Huld enn og aftur innilegrar afsökunar á framkomu minni og þeirri vanlíðan sem ég hef valdið henni.“