Dætur 92 ára konu sem var látin sofa inni á  salerni á lyflækningadeild Landspítala síðustu nótt, voru skammaðar af starfsfólki spítalans fyrir að taka mynd af aðstöðunni og birta á Facebook. DV greindi frá því fyrr í dag að 92 ára gömul móðir Berglindar Sigurðardóttur hefði þurft að eyða nóttinni á klósetti með kúabjöllu til að fá aðstoð.

„Ég skildi við hana í gærkvöldi og þá var hún bara grátandi. Hún sagði: „Núna er þetta bara búið, ég á eftir að deyja hérna í nótt. Svo spurði hún hvort ráðherrarnir myndu láta bjóða sér þetta,“ segir Berglind í samtali við DV en hún birti meðfylgjandi mynd á Facebook í gærkvöldi  sem sýnir aðstæður móður hennar á spítalanum.

Sjá einnig: 92 ára konu komið fyrir á salerni á Landspítalanum

Anna Sigrún Baldursdóttir, aðstoðarmaður Páls Matthíassonar forstjóra Landspítalans, harmaði málið í samtali við fjölmiðla í morgun. „Við hörmum að það þurfi að grípa til svona úrræða og gerum allt til að stytta tímann sem fólk býr við svona aðbúnað. Þetta er ekki þjónustan sem við viljum bjóða,“ sagði Anna Sigrún. Bætti hún við að þetta væri „birtingarmynd þess ástands sem við búum við vegna skorts á hjúkrunarrýmum.“

Berglind segir í samtali við Stundina að þær hafi fengið skammir vegna myndbirtingarinnar frá starfsfólki: „Við fengum skammir fyrir að vekja athygli á þessu í morgunmatnum í morgun, þegar komið var með hann og honum nánast skellt ofan á klósettsetuna,“ segir Berglind við Stundina. „Okkur var sagt að ekki væri leyfilegt að taka myndir af aðstöðunni. Við svöruðum því til að við gætum ekki annað, við hefðum bara fengum bara áfall þegar við sáum við hvaða aðstæður hún þurfti að búa. Við báðum um að henni yrði í það minnsta rúllað fram svo hún fengi nú að borða morgunmatinn sinn frammi á gangi frekar en inni á klósettinu.“

Búið er að koma móður Berglindar fyrir inni á sjúkrastofu. Berglind segir: „Það síðasta sem hún sagði við okkur í gærkvöldi, grátandi, var: „Skyldu ráðherrarnir láta bjóða sér þetta ef þeim yrði rúllað hér inn.“